Friday, March 13, 2009

siri berpantun adat nogori sembilan

Anak puyu kek dalam kolam,
Memang tak sodap dibuek kari,
Mari kito samo menyolam,
Cari makno pantun nogori.

Tombakau kampong disiat-siat,
Digulung-gulung sampailah padat,
Kami nogori memang tebiat,
Bia mati anak jangan mati adat.

Menjalo koli yang dapek eh haruan,
Pucuk dipotik dibuek ulam,
Walau kami berajokan Yamtuan,
Adat totap bosondikan Islam.

Hidup kami bersuku-suku,
Kojo suku melantik lombago,
Hukum adat takdo dibuku,
Bilo diwarih an kono la berjago.

Hukum adat sonantiaso tejago,
Penjago eh gagah kalahkan badang,
Dari buapak datang eh lombago,
Dari luak datang eh undang.

Poei ke kobun monanam torong,
Hasil dituai ponuh molato,
Solalu bona dipandang serong,
Bab kawin dan juo harto.

Rumah kampong atap rembio,
Tanggo eh tinggi anjung eh lueh,
Mombanting kek sawah bukan sesio,
Bojual laku dimakan pun pueh.

Pokok kundang tinggi eh rimbun,
Buah jinggo wangi bau eh,
Kojo kami banyak menimbun,
Bilo parang kek tangan jangan dilekeh.

Kalau nak kayo konolah gigih,
Omeh disimpan karung dah sondat,
Bilo zaman dah makin canggih,
Makin ramai yang lupo adat.

Tuo-tuo biang koladi,
Jangan dah tuo nak tambah bini,
Kalau pantun tak berapo menjadi,
Jari den susun mintak disantuni.

6 comments:

  1. kah kah kah!!
    apesal sinis je bunyinye tu?
    hahahaha!

    ReplyDelete
  2. ahaha..
    apo kono eh ekau ni..
    lwk je..
    hahax..
    xde pnjg lg ke..
    hahax

    ReplyDelete
  3. philocoly-
    hahaha!
    sajo yo promosi sket..
    xdo la malu nak ngaku kampung den..
    haha!

    ReplyDelete
  4. pomanih totap di hati!!hehe..tetibo yo lak kn?=p

    ReplyDelete
  5. fazilah-
    haha!! tesodak den kojap..!
    sompek yo buek promosi kek sini..?!
    haha!

    ReplyDelete

It may take me hours, days or even months, but I WILL reply to your comment(s). Godwilling.